Sunday, February 16, 2014

එකම එක දිය බිඳක්
පතිත විය
පරිපීඩිතව ඇවිද
නිරුදක කතර
ජීවිතය හැර දමන්නට
තීරණය කළ
අවසන් තත්පරයේදී

Sunday, June 23, 2013

ආදරයේ දේශපාලනය

සමාජවාදී දෘෂ්ටි  මායාවෙන් 
ඒකාධිපතීත්වය මුවා කර 
දෙපාර්ශවය 
බල අරගලයක 

මානව හිතවාදයෙන් ඇරඹි සන්ධානය
කුඩුපට්ටම් වී යන හැටි 
මමත්වය රජ වූ කල 

පාලක පක්ෂය හා විපක්ෂය 
අතර දෝලනය වී මැකී යන  
අසරණ ප්‍රජාතන්ත්‍රවාදී ආදරය  

Friday, May 3, 2013

අළු පැහැ වළා ගුලි වී 
අපේක්ෂාවේ රත් ගිනි දළු වසන් කළ 
මන්දාරම් හැන්දෑව 

විශ්වාසයේ හිරු බැස ගොස් 
හිස් වී ඇත ජීවිත අහස් තලය 
ප්‍රේමයේ සියොතුන් 
වෙනත් අහසක් සොයා 
ඈතින් ඈතට පියා සලනා හැටි 

හිරු උදා වේ ද නැවතත් 
හෙට දින 
හුදෙකලාවේ අඳුරු වළා දෙස බලා 
සිතමි මම 

Monday, February 4, 2013

නිදහස!

තවමත් ඇද හැලෙන 
අනෝරා වැස්ස මැද 
තෙමුණු හිත ගුලිකරන් 
ඇවිදින විට 

ඈත අහසේ අළු වළා මැද 
රන් පාටින් දිලෙන 
පුංචි හිරු කිරණක් දුටුවා 

තව දුරයි එතැනට 
කටු කොහොල් මග දිග 
ඒත් යා යුතුමැයි 
විඩාබර හිත කීවා 

Friday, December 28, 2012

බලාගෙනයි !


ඔබ සතුටින් උඩ  පැන නටන විට 
මේ තණපත් මත රැඳි පිණිබිඳු 
තැලී පොඩි වී යාවි 

Thursday, April 19, 2012

මගේ ඒකපාර්ශවික ආදරය!

දස අත විසිරුණු ඔබේ මතකයන්
දෑස පියන්නට ඉඩ නොදෙයි මට
සියොළඟ තැවරුණු ඔබේ සුසුම් පොද
හුස්ම ගන්නට ඉඩ නොදෙයි මට

දවාලයි මා!
ඔබට කළ ආදරයෙන්
ඔබටම පමණක්
කළ ආදරයෙන්

වෙනතක් බලා සිටින ඔබ දෙස
රහසින් බලා තුටු වෙමි
ජීවිතය පුරා ඔබ තබා ගිය
පියසටහන් පිරිමදිමි ආදරෙන්
මින් මතුව...
 

Saturday, March 17, 2012

අවසන් කව

සිදී ගිය දිය කඩිත්තක් මම 
නැත ප්‍රේමයේ එක සුළං පොදක්
ජීවිත මේඝය කැන්දන් එන්නට

සොඳුරු සිතුවිලි මැකී ගිය සඳ
හිරිවැටුණු ආත්මය සතපවන්නට
අඳුරු මිනී වළක් කණිමි මම 

මහන්සියි 
මහන්සියි ජීවිත මිරිඟුව හඹා ගොස්

නෙතු පියා සිහිනයක සැනසුම ලබන්නට
නැලවිලි ගීයක් ගයන්නට
ආදරෙන් හිස පිරිමදින්නට
කෙනෙකු නොමැති කල
පුපුරා හැලෙයි ආත්මය

කැට කැබිලිති පිරුණු ගොහොරු කළල් බිම
වැතිර හිඳිමි දැන්
ප්‍රේමය සොයා ඇවිද සියක් ගව් දුර  
වෙහෙසයි අපමණ දෙපයට

විරාමය දිය යුතුයි
ඉතින් මේ දිවියට